Helse og omsorg 2022

Det skjer mykje spennande innan helse og omsorg i løpet av eit år. Under har vi samla nokre høgdepunkt frå 2022. Klikk på lenkene i innhaldslista så kjem du direkte til den enkelte avdelinga. God lesnad!

Innhald

Pleie og omsorg

Sektoren skal sørgje for at personar som bur og oppheld seg i kommunen får forsvarlege helse – og omsorgstenester. Det skal vera samsvar mellom pasienten sine behov og nivået på tenestetilbodet. Til grunn for all tenestetildeling, ligg individuell kartlegging og tverrfagleg vurdering. Tildelingskontoret for Lom og Skjåk utfører sakshandsaming og fattar einskildvedtak i samråd med tenestene.

Heimebasert omsorg

Heimebasert omsorg består av dei tre avdelingane heimesjukepleie, praktisk bistand (heimehjelp) og dagsenter for heimebuande demente. I tillegg er kvardagsrehabiliteringsteam, kreftkontakter, og demenskoordinator underlagt tenesta. 2022 vart eit år der koronarestriksjonane vart oppheva, og omfanget av tenesteyting inn heimebaserte tenester auka som førespegla.

I mai 2022 vart det tilsett ny avdelingssjukepleiar.
Risikotavle er forankra og er ein naturleg del av den daglege drifta for å sikre kontinuerleg kvalitetsforbetring og brukartryggleik.
Ein tilsett har fullført vidareutdanning innan kreftomsorg, så nå har tenesta både kreftsjukepleiar og sjukepleiar med vidareutdanning innan palliasjon. Desse fungerer som kreftkontakt, og deler på ei 20% stilling.
Det vart innført Pasientnett som effektiviserer kommunens tilgang til reseptopplysingar og bestilling av medisin til pasientane via nettet.
Heimebasert omsorg deltok i ¨Digitalt sårprosjekt¨.  Her samarbeider sjukehuset Innlandet med Vestre Viken, Sunnaas og Sørlandet sjukehus om å etablere Digitale sårtenester etter ein felles tenestemodell. Etablering av eit felles digitalt sårtenestetilbod er eit godt og målbart tiltak for digital samhandling mellom sjukehus, kommune og fastlegar. Sårpasientar er ei pasientgruppe som krev langvarig behandling og store ressursar for sjukehus og kommunar. Det kan derfor vere nyttig å kunne veksle mellom fysiske konsultasjonar og videokonsultasjonar. Ved bruk av videokonsultasjonar direkte heim til pasienten, kan ein oppnå gevinstar som at pasienten unngår unødig transport til sjukehus, raskare oppfølging og redusere komplikasjonar og innleggingar.
Vi har nå to instruktører innenfor Proact (Tidleg oppdaging, rask respons og teamarbeid ved forverra somatisk tilstand). I løpet av 2023 skal desse to halde kurs for andre tilsette.
På dagsenteret vart det sådd og prikla, planta blomar, sådd grønsaker som erter og gulrøter. Drivhuset vart teke i bruk der det blant anna vart dyrka tomatplanter og agurkplanter. Brukarane sette pris på mange fine stunder med blant anna kortspel i drivhuset. Det vart litt innhausting av erter og gulrøter. Bærplukking i private hagar har også vore ein aktivitet. Det har vorte mange fine bilturar som brukarane har sett veldig pris på.
Hukommelses teamet deltek inn i forbetringsnettverk i samband med demensplan 2025 - rett tiltak til rett tid.

Miljøarbeidartenesta

Miljøarbeidartenesta sitt fokus er å legge til rette for meistring og god livskvalitet for brukarane våre. Miljøarbeidertenesta yter bistand til å meistre kvardagen på individnivå.

I 2021 kom rettleiaren "Gode helse- og omsorgstenester til personar med utviklingshemming". Det overordna målet med denne rettleiaren er å bidra til at personar med utviklingshemming og deira familie får leve gode liv i tråd med eigne føresetnadar, ynskje og behov. Gode tenester må forankrast i fagkunnskap, faglege retningsliner og rettleiarar, og i allmenngyldige samfunnsetiske normar.

I 2022 kom det ei ny Stortingsmelding frå Kultur- og likestillingsdepartementet som heiter "Menneskerettar for personar med utviklingshemming - Det handlar om å bli høyrt og sett". Denne tek mellom anna utgangspunkt i CRPD. Ein FN-konvensjon som skal bidra til å motverke diskriminering på grunn av nedsett funksjonsevne. Konvensjonen skal sikre respekt for dei gjeldande sivile, politiske, økonomiske, sosiale og kulturelle rettane til menneske med nedsett funksjonsevne.

Miljøarbeidartenesta har fokus på aktivitetar, arbeid og arbeidssenter. Eksempel på aktivitetar i 2022 er ferietur til Hunderfossen og Kvitfjell, sosialt samvær med brukarar frå anna kommune og individuelt tilrettelagt aktivitet for den einskilde.

Velferdsteknologi er viktig. Tenesta har kjøpt Yetiskjerm som er eit stort og robust nettbrett som kan nyttast både som lærings- og aktivitetsverkty. Både individuelt og i grupper.

Kompetanseheving: 3 tilsette er i gang med grunnutdanning. Vi nyttar og E-læring i regi av Norsk Helseinformatikk.

Lom helseheim

Fyrste kvartalet av 2022 var ei utfordrande periode for Lom helseheim på grunn av koronavarianten Omikron. At dei tilsette hadde god fagleg kompetanse på hygiene og smittevern, samt eit godt forankra forarbeid med retningsliner og prosedyrer gjorde at vi kom gjennom perioden utan dei alvorlege konsekvensane. Denne perioden viste kor sterkt eit lag på tvers av helsesektoren er, når alle dreg i same retning. Det resterande av året 2022 gjenkjennast av at det meste normaliserte seg med tanke på Covid-19, og Decon-X maskina (ein desinfeksjonsrobot) fekk kvile etter å ha vore aktivt i bruk det fyste kvartalet.

I januar 2022 kom det ein sjukepleiarstudent på Lom helseheim. Vi har eit mål om å ta imot studentar og lærlingar kvart år og meiner det er ein fin måte å rekruttere helsepersonell på.

Lom helseheim vart hausten 2021 med i KS Innlandet sitt program "Innovativ bemanningsledelse – Rusta for framtida" som handlar om nytenking og innovasjon: oppgåveløysing, arbeidsplanlegging og turnus. "Hvordan skal vi best mulig bemanne helsetjenestene fremover?"

Hausten 2022 vart det etter godt grunnarbeid, jobba med ny turnus der mellom anna langvakter på helg vart ein realitet, og endring av vaktlengde for å optimalisere drifta på Lom helseheim. Her har arbeidsgruppa hatt stort fokus på involvering av medarbeidarane. Dei tilsette har ved fleire høve fått moglegheit til å koma med innspel og tankar om drifta og turnus.

Eit anna resultat av arbeidet arbeidsgruppa la ned i 2022 etter innspel frå tilsette var å flytte mellom avdelingar på huset, frå avdeling 4 til avdeling 2. Dette er ei avdeling av nyare dato med større areal pr rom og betre tilrettelagt for hjelpemiddel. Vi kan i ettertid konkludere med at dette var eit positiv steg i riktig retning for å auke kvaliteten på tenesta både for tenestemottakaren (pasient og pårørande) så vel som tenesteytaren (tilsette).

Lom helseheim markerte verdas handhygienedag den 5. mai 2022. Kreative løysingar for å sette fokus på kor viktig det er med god handhygiene og andre smittevernrutinar. Dette er dei viktigaste tiltaka i kampen mot infeksjonar og antibiotikaresistens i helse- og omsorgstenesta.

Våren 2022 hadde også pleie og omsorg stand i Utgard under ei jobbmesse i regi av NAV.

Pasientvarslingssystem frå NetNordic

Nytt pasientvarslingsanlegg har vore arbeidd med gjennom fleire år, da det ordinære starta å vise symptom på lang levetid, og reservedelar var bort i mot umogleg å få tak i. Det gamle satte også stoppar for å ta i bruk hensiktsmessig velferdsteknologi. Det nye pasientvarslingsanlegget frå NetNordic kunne endeleg takast i bruk på seinsommaren 2022. Dette resulterte i at Lom Helseheim kunne ta i bruk velferdsteknologi i ein større grad. Velferdsteknologien skal ikkje erstatte dei varme hendene til dei tilsette, men være med som eit verkemiddel for å auke meistring og tryggheit. Både pasientane og dei tilsette møtte denne endringa med opne armar, og innovasjonsprosessen vil halde fram inn i 2023.

Kjæledyr ei kjelde til trivsel og betre helse

Ved fleire høve kom det besøkande som hadde med seg hund, til stor glede for bebuarane. Kjæledyr er for mange ei kjelde til trivsel og helse. Det finst forsking som viser den målbare positive effekten dyr har på vår fysiske og psykiske helse.

Nasjonalforeininga for Folkehelse Lom demensforeining gav 2 kattebamsar og 3 hundebamsar til helseheimen. Dette er vektbamsar som kan ha ei berolegande effekt, og som personar med demens kan ha glede og nytte av. Lom demensforeining har også bidratt med konsert med Mari Midtli og Astrid Sulheim.

Nyrneslegatet

Nyrneslegatet har gjennom året vore med å finansiert fleire trivselstiltak for pasientane på Lom Helseheim, noko vi er svært takknemlege for. Legatet har finansiert frisørtimar og fotpleietimar for pasientane, samt finansiert julekoldtbord, konsert med Odde og Thorud, og julekonsert med Gjeling-Ljomen. Legatet har bidrege til oppgradering av uteområde på Fredly med ny benk og blomsterkasser, og oppgradering av veranda på avdeling 3 og 4, med mellom anna nye utemøblar som har resultert i at pasientane trivst svært godt ute sommarhalvåret.

Kjøkenet

Lom Helseheim er svært takksame for å ha eit fantastisk kjøken med tilsette som lagar nydeleg mat med varmt hjarte heile året.

Bilete frå pleie- omsorgsavdelinga

Helse og velferd

Kommunen skal sørgje for at personar som oppheld seg i kommunen får tilbod om naudsynte helse- og omsorgstenester. Dette omfattar alle pasient- og brukargrupper, herunder personar med somatisk eller psykisk sjukdom, skade eller liding, rusmiddelproblem, sosiale problem eller nedsett funksjonsevne (Jfr. helse- og omsorgsloven § 3-1).

Ergo- og fysioterapitenesta Lom og Skjåk

Etter eit par år med koronarestriksjonar var 2022 eit år med meir normal drift for ergo- og fysioterapitenesta. Det har vore stor pågang på tenesta i løpet av året. På fysioterapien har ein hatt full bemanning heile året pga god hjelp av vikarane Jannike Jensen, Gunvor Hesla og Marit Sandviken. Det har i siste halvdel av året vore redusert bemanning på ergoterapien, og ein har foreløpig ikkje lykkast med å få tak i vikar eller fått tilsett nokon i full stilling. Det blir kontinuerleg arbeidd med å rekruttere ergoterapeut.

Verdsdagen for fysioterapi vart markert der årets tema var artrose. Det vart gjennomført artroseskule vår og haust. Ergoterapeutane hadde kurs i aktivitetsbalanse.

Tenesta har i løpet av året hatt fleire tilbod om gruppetrening: kondisjonsgruppe, varmtvassbading, supergym, aktive saman, basal kroppskjennskap og andre treningsgrupper på sal.

Det har vore gjennomført kurs på ulike område, bl.a. fysioterapi for barn og ungdom, livsstyrketrening, Parkinson og KOLS. Avdelinga har hatt sju fagdagar med forskjellige tema: motiverande intervju, prolaps, smerte, smertebehandling på Sunnaas, observasjon av barn, livsstyrketrening og kols.

Det vart gjennomført fleire samarbeidsmøtar med Psykisk helseteneste Lom og Skjåk. Det vart satt ned ei tverrfagleg prosjekt gruppe som arbeide med å lage eit tverrfagleg tilbud til pasientar med kronisk smerte. Dette samarbeidet vart satt på vent utover hausten pga redusert kapasitet og stor arbeidsmengde. Ein håpar å ta opp att dette samarbeidet ved høve.

Psykisk helseteneste Lom og Skjåk

2022 var eit utfordrande år med tanke på kapasiteten i psykisk helseteneste. Det var periodar med både ei og to sjukemeldingar på same tid. Det er utfordrande å dekkje opp fråver med vikar, så tenesta har etter beste evne prøvd å imøtekome dei som har hatt mest behov. I desember måtte vi innføre inntaksstopp grunna stort fråver i personalgruppa. Godt og tett samarbeid med kommunepsykolog Morten har vore avgjerande for å ha greidd å stå i desse utfordrande tidene.

Tenesta har jamn pågang av nye henvendingar, det er til ei kvar tid mellom 75-90 aktive saker som tenesta fylgjer opp i Lom og Skjåk.

Tenesta har vore på Rus og psykisk helsekongress i Oslo. Eit viktig bidrag for å få ny kunnskap samt få oversikt over det som rører seg innan fagfeltet.

I juni fekk tenesta ansvar for " Rådgjevande eining for russaker". Tenesta har ansvaret for å møte personar når oppmøte er sett som villkår for ein bestemt straffereaksjon i russaker. Dette omfattar også å gjennomføre ruskontrollar om dette er sett som vilkår. Primæroppgåva for psykisk helseteneste er å gje oppfølging, råd og veiledning til personar som er ilagt møteplikt, ruskontrollane blir organisert på legekontoret.

Det er sett i system faste samarbeidsmøter med heimetenesta og fysio/ ergo.tenesta.

Vi har hatt ein sjukepleiarstudent i 10 vekers veileda praksis.

FACT prosjektet har runda 2 år. Tenesta bidreg med 20% ressurs inn i FACT teamet. Det er avdelingsleiar som har denne funksjonen og har stort sett FACT dag kvar torsdag.

Tenesta har ei aktiv Facebook side, der det blir lagt ut nye innlegg kvar veke. Fokus er informasjon om psykisk helse og ein vektlegg korleis kvar einskild kan ivareta si psykiske helse på ein best mogleg måte. Vi har 638 følgjarar. ( sjå statestikk i vedlegg )

Verdensdagen for psykisk helse den 10. oktober vart markert i samarbeid med biblioteka i Lom og Skjåk, med 2 ulike arrangement. Tema for årets verdensdag var "Vi trenger kvarandre, lyft blikket". Det var god deltaking på begge tilstellingane.

Kommunepsykologen

Kommunepsykologen gir rettleiing/fagstøtte til personale og tenester i kommunen, yter lågterskel behandlings- og oppfølgingtilbod, og bidreg til system- og samfunnsretta arbeid.

I alt arbeidet vektlegg ein å utøve og utvikle tverrfagleg samhandling og styrke brukarmedverknad.

Det viktigaste gjennom 2022 har vore å arbeide for å oppretthalde kvaliteten på tenesta og vidareutvikle samarbeid og samhandling på tvers av fag og tenesteområde, særs i høve arbeid med barn og ungdom.

Lom legekontor

2022 har vore eit innhaldsrikt år for legetenesta i Lom. Vi har oppretthalde normal drift, fått nye medarbeidarar ved kontoret og både legar og sekretærar har fått fagleg påfyll i form av ulike kurs.

Vi fekk dessverre ikkje turnuslege i perioden mars-september, så gleda var stor da Tiki Midthassel kom til oss som turnuslege i september. Marte Kolden starta opp hjå oss som ALIS (allmennlege i spesialisering) i april. Ho har også vore fungerande tilsynslege ved Lom helseheim.

Med ein lege ute i permisjon frå august hadde vi noko utfordringar med å rekruttere vikar til stillinga, og vi var da så heldige at Christen Halle kunne steppe inn som vikarlege.

I september arrangerte vi drop-in for celleprøve i samband med sjekkdeg-kampanja til kreftforeininga. Også i år var vi svært tilfredse med oppmøte, og dette er noko vi kjem til å fortsette med!

Vi ynskjer elles å takke alle samarbeidande tenester for eit godt samarbeid i 2022!

Helsestasjons- og skulehelsetenesta

I 2022 har Helsestasjons- og skulehelsetenesta og Helsestasjon for Ungdom vore tilgjengeleg i heile perioden med pandemi, tenesta har fulgt statlege retningsliner der det har vore særskild fokus på at tilbod til barn- og unge skal oppretthalde normal drift.

Tenesta tok over ansvaret for å koordinere smittevernsarbeidet med korona frå våren 2022.

Tenesta har fokus på førebygging på individ- og gruppenivå. I år fekk vi gjennomført to barseltreff på Helsestasjonen, i juni eitt barseltreff saman med Skjåk helsestasjon, og i haust eitt treff for Lom sine barselforeldre.

Tilbodet om fyrstehjelpskurs til føresette, vart gjennomført i juni for 2021-kullet og i november for 2022-kullet. Tenesta leiger inn ambulansepersonell for teoretisk og praktisk gjennomgang.

Tenesta hadde tilbod i haust om gruppebasert Cos-P kurs (foreldrerettleiingsprogram) saman med Skjåk, men det vart for få påmeldte til å gjennomføre kurset.

Kommunen tok i mot 16 flyktningar i 2022. Helsetasjonen gjennomfører fyrste kartleggingsamtale i samarbeid med kommunelege. Tenesta har godt samarbeid med flyktningtenesta i Skjåk. I haust hadde tenesta eitt kurs med foreldrerettleiingsprogram ICDP til flyktningar i Lom og Skjåk, foreldrerettleiingsprogram er obligatorisk i opplæringsprogrammet for flyktningar.

Vaksinering med sesonginfluensa vart gjennomført i lokala på helsestasjonen. Det var stor pågang, det same med vaksinering mot covid-19.

Tenesta søkte og fekk tildelt statlege midlar til vidareføring og styrking av lønsmidlar for 3 år.

Lom kommune tok over ansvar for bemanning i skulehelsetenesta på vidaregåande skulen i Lom frå 01.01.2022, og tenesta vart styrka med 20% stilling til dette føremålet.

Vertskommunesamarbeid Lom og Skjåk Helsestasjon vart administrativt og politisk vedteke. Oppstart frå 01.01.23 med Skjåk som vertskommune.

Svangerskapsomsorg

Den viktigaste oppgåva til svangerskapsomsorgen er å fylgje dei gravide gjennom svangerskapet. Målet er å ta vare på barnet i magen, diagnostisere avvik og gje dei ein start i livet utan skade eller sjukdom.

I svangerskapsomsorgen er det tilsett jordmor i Lom, saman med Skjåk. Vi samarbeider i tillegg om interkommunal jordmorvakt på Otta.

Tenesta har hatt normal drift att dette året.

Det vart fødd 13 nye lomværar.

Flyktningetenesta

Det vart eit spesielt år for flyktningetenesta. På bakgrunn av krigen i Ukrania og anmodning om å ta i mot eit stort antal flyktningar i Norge, vart det gjort vedtak om busetjing av 15 flyktningar i Lom i 2022. Vi busette totalt 16 - dei aller fleste vart busett i kommunale bustadar.

Tidlegare busette flyktningar i Lom hadde vore her så lenge at dei var ute av oppfølgjingsystemet, dei var integrerte – ein del hadde også flytta mellom anna på grunn av arbeidsmoglegheiter.

Vi hadde ikkje flyktningkonsulent på starten av året, men det vart tilsett på nyåret, ho starta i jobben i mai. I november tilsette vi ein til i tenesta.

Det gjekk litt tid før dei fyrste Ukrainske flyktningane vart busett i Lom, dei kom alle i 2. halvdel av året, og det vart ei veldig hektisk og spanande periode.

Flyktningtenesta har ansvaret for oppfølging av dei som er busett etter anmodning av Integrerings- og mangfoldsdirektoratet. Tenesta gjev praktisk burettleiing og er ein viktig kontaktperson for flyktningane. Tenesta yter rettleing og integreringsarbeid generelt i lokalsamfunnet. Elles er arbeidsoppgåvene mange og varierte, og ein arbeider tverrfagleg som eit kontaktledd mellom flyktningane og andre samarbeidspartar. Målet er å følgje opp kvar einskild flyktning på best mogleg måte.

Lom kjøper tenester frå Vaksenopplæringa i Skjåk til norskopplæring.

Flyktningtenesta i Lom vil takke alle som har bidrege med stort og smått til flyktningane i Lom i 2022. Den friviljuge innsatsen er veldig viktig i integreringsarbeidet, ikkje minst for at flyktningane skal få språktrening.

Bilete frå helse- og velferdsavdelinga

Oss i Lom

I 2022 inviterte kommunen Frys film til å ta pulsen på ein god dag på arbeid for Lom kommune. Spol deg fram til 2:03 for å sjå ein snutt frå Psykisk helseteneste. Frå 2:45 kan du sjå ein snutt frå Lom helseheim.

Publisert 15.03.2023 09.45

Lom kommune

Viktig melding

Brøyting vinteren 2024/2025