• Lom grensar til kommunane Vågå, Skjåk, Luster, Vang og Lesja.   
• Kommunen har eit areal på 1945 km2
• Over 90% av arealet i Lom er over 900 m.o.h.
• Lom er den mest typiske fjellkommunen i Noreg, med 135 eine toppar og 23 grensetoppar over 2000 m.o.h. 
• Rundt 60% av arealet i Lom er verna – vi har mellom anna tre nasjonalparkar (Breheimen, Jotunheimen og Reinheimen). Sentrum fekk status som nasjonalparklandsby i 2008. 
• Lomskyrkja frå sist på 1150-talet er ei av dei største stavkyrkjene i landet
• Bygda har lange tradisjonar innan jordbruk og reiseliv 
• Kommuneblomen i Lom er Issoleie (Ranunculus glacialis)

Lurar du på kor mange som bur i Lom? Sjå oppdatert statistikk på ssb.no.

Lom kommune ligg i Ottadalen (den største sidedalen til Gudbrandsdalen) i Innlandet fylke. 
Kommunen tilhøyrer regionen Nord-Gudbrandsdal, som i tillegg til Lom består av Lesja, Dovre, Sel, Vågå og Skjåk.   

Kommunen grensar i nordvest til Skjåk, i nord til Lesja, i aust og søraust til Vågå, i sør til Vang og i sørvest til Luster.  

Administrerande senter i kommunen er Fossbergom, og ligg 382 moh.

6 av Noregs høgste fjell over 2350 moh. ligg i Lom: 

• Galdhøpiggen, 2469 moh.
  (Galdhøpiggen er Fastlands-Noregs, Skandinavias og Nord-Europas høgste fjell.)
• Glittertinden, 2452 moh.
• Store Skardstinden, 2373 moh.
• Veslpiggen, 2369 moh.
• Surtningssue, 2368 moh.
• Store Memurutinden, 2366 moh.

Omkransa av dei høgaste fjelltoppane i landet har Lom ein særmerkt topografi, der naturattraksjonane ligg som perler på ei snor. Det er ikkje utan grunn at Lom er både nasjonalparkkommune og Lom sentrum (Fossbergom) er nasjonalparklandsby.

Mesteparten av arealet i Lom er snaufjell og brear der over 90% av arealet ligg over 900 moh. Innan kommunen ligg meir enn halvparten av Jotunheimen nasjonalpark og båe dei to høgaste fjelltoppane i Noreg, Galdhøpiggen på 2469 moh. og Glittertind, som er fast fjell på 2452 moh. med ein isbre på toppen. Gjennom fjellområda i kommunen går to dalføre, Ottadalen og Bøverdalen. Desse to dalane møtest ved tettstaden Fossbergom,  382 meter over havet. Folk bur for det meste langsmed sørsida av Ottadalen. Andre busette område i kommunen er Lia, Garmo og Bøverdalen.

Fleire naturområde i Lom er verna, mellom andre delane av kommunen som ligg innanfor nasjonalparkane Jotunheimen, Breheimen og Reinheimen, i tillegg til tre mindre naturreservat.

Geografien vekslar mellom dei høgaste tindane i Nord-Europa, stupbratte fjellsider med iaugefallande fossar, tronge bekkefar, fiskerike vatn, dalføre med gamalt kulturlandskap og skogkledde lier. 

Alle vegar fører til Lom – nesten. Frå her tek det mellom fire og fem timar til Oslo, Bergen og Trondheim med bil, og ein time med bil/buss til Otta, som har togsamband nord- og sørover. 

Fleire busselskap fraktar deg til dei fleste reisemål i Midt-Noreg. På eit par timar er du i Geiranger, og vegen over Sognefjellet fører fram til Luster, som ligg i botnen av den lengste fjordarmen på Vestlandet. Vegen over Valdresflya tek deg til Fagernes.

Dei viktigaste ferdselsårane gjennom Lom er Rv15 (heilårsvegen Otta-Måløy over Strynefjell) og Fv55 (Sognefjellsvegen) frå Fossbergom gjennom Bøverdalen og Leirdalen gjennom Leikanger til Vadheim i Høyanger. Det er òg samband med ekspressbuss til m.a. Bergen, Trondheim og Oslo.

Lom er bygda som likar å gå sine eigne vegar. Her finn du lange tradisjonar innanfor musikk, dans, handverk, byggjeskikk, landbruk og matstell. Vi har reine råvarer på fjell og i fjøs. Dette er verdiar vi er stolte av. 

Bygda har eit rikt organisasjonsliv, og det friviljuge arbeidet til om lag 40 lag og foreiningar set sitt tydelege preg på fest og fritid. 

Byggjestil, husflid, handverk og lokale musikktradisjonar har ikkje gått tapt i møtet med nasjonal og internasjonal påverknad. Vi vil leggje vekt på å støtte kulturtiltak som aukar trivsel og tryggleik og styrkjer samkjensle og identitet. 

Sentrumet Fossbergom er kjent for sin særeigne stil, med brune hus og bestemte krav til takvinkel og materialval. 

Opplev kultur

Lom kan by på fleire kulturopplevingar som kan vere spennande å oppsøkje. Under har vi nemnt noko, men ynskjer du fleire tips om museum og kulturminne kan du gå til Visit Jotunheimen si nettside.

Lom stavkyrkje vart bygd på 1100-talet og er ein av dei største stavkyrkjene i landet. Gamle Garmo kyrkje, som vart bygd i 1021, vart riven i 1880, og reist opp att på Maihaugen i Lillehammer som del av De Sandvigske samlinger.

På Fossheim steinsenter finn du samlingar av stein frå heile verda, særleg mange mineral frå Jotunheimen.

Norsk fjellsenter er autorisert besøkssenter for Jotunheimen, Reinheimen og Breheimen nasjonalparkar. Her kan du få tips om turar som passar for deg og ditt turfølgje, og informasjon om dyreliv og vekster i nasjonalparkane. I tillegg kan du mellom anna kan du sjå utstillingar og besøke minivitensenteret Fjellviten, samt delta på vikingfredag og rebusløp. 

I Presthaugen (Lom bygdemuseum) finn du 21 tømmerhus frå 1600-,1700- og 1800-talet; samt det som kan vere Noreg sitt største stabbur.

Diktaren Tor Jonsson vaks opp i Andvordsjordet i Lom, og staden kan du sjå ved å følgje fotturen mot Bordvassvegen. Tor Jonsson-stugu ser du rett etter du har teke av frå riksvegen. 

Det er og mykje som tyder på at Knut Hamsun vart fødd i Garmo i Lom kommune. Ein minnestein er reist ved Hamsunstugu i Garmo.

Kvart år vert litteraturfestivalen Diktardagar arrangert.

Lom kan tilby ei av dei mest etterspurde varene blant utanlandske turistar - stillheit og ro. Vi fører ein restriktiv politikk mot motorferdsel i utmark, og du vil alltid finne ein plass for å koma vekk frå den stressande kvardagen. 

Ein lomver nyttar fjellnaturen i sitt daglege liv; gjennom hausting av utmarksressursar og aktivt uteliv. Vidare legg vi vekt på bruk av fjellet på andre måtar; naturbasert reiseliv, tradisjonelt reiseliv og nye uteaktivitetar - så vel i barnehage og skule, som i eldreomsorg og kyrkja sine fjellmesser utandørs. 

Vi ønskjer at friluftsliv skal vera for alle og vil vise kva friluftslivet har å seia for å fremja ei god helse og auka trivsel. Stikkord er naturglede og felles opplevingar. 

Sjølv om Lom omfattar store fjellområde med lite dyrkbart areal, er jordbruket framleis viktigaste næringsveg. Gardane ligg gjerne 365–450 meter over havet. Klimaet er tørt, så vatning er nødvendig og har lang tradisjon (Lom har noregsrekorden for minst nedbør på eitt år – 130 millimeter, 1911). Det er som regel rikeleg med vatn i bekkar og elver frå fjellet. Avlingane av bygg, poteter og gras er ofte høgare enn landsgjennomsnittet, og husdyrhaldet er stort. Husdyra nyttar framleis ein del av fjellbeita, som også blir brukte av eit tamreinlag.

Lom er på grunn av sine mange verna vassdrag ein svært liten kraftkommune, med ein gjennomsnittleg årsproduksjon på 47 gigawattimar (GWh) per 2016. Det er to kraftverk i kommunen, største fallhøgd er 123 meter.

Turisme er og ei viktig næring for Lom og vi har stort besøk av turistar, ofte med Jotunheimen som mål. 

Lom ligg i Ottadalen - den største sidedalen til Gudbrandsdalen.
Lom tilhøyrer regionen Nord-Gudbrandsdal som består av kommunane Lesja, Dovre, Sel, Vågå, Lom og Skjåk. 

Lomseggen er 1289 moh. og ligg i Breheimen nasjonalpark. 

Frå Lomseggen kan du gå vidare til Eggjapiken som er 1529 moh. 

Bøvra (Bøvre, Bøvri). 

Elva Bøvra er eit verna vassdrag, og har sitt utspring frå Bøverbrean, som er ein av tre brearmar på Smørstabbrean (Bøverbrean, Leirbrean, Sandelvbrean). Smørstabbrean er den største breen i Jotunheimen.

Bøvra drenerar store delar av Jotunheimen, og ein god del av Breheimen. Dette er såleis ei typisk flaumelv, der variasjonane i vassmengda kan sprike frå 1 m3 til 300 m3 i sekundet. Bøvra er også rekna for å vera av dei mest slamdrivande elvene i heile Noreg, dette grunna all slam og sediment forårsaka av breane våre.

Lom, eller nærare sagt Fossbergom (sentrum av Lom), fekk status som nasjonalparklandsby i 2008. 
I tillegg til Lom har Geilo, Jondal, Vingelen og Storslett status som nasjonalparklandsbyar i Norge.

I Lom kommune finn du følgande nasjonalparkar: Jotunheimen, Reinheimen og Breheimen.

Kva er ein nasjonalparklandsby?

Ein nasjonalparklandsby er ein tettstad som skal

• vere ein naturleg innfallsport til nasjonalpark
• gje informasjon om å ferdast i nasjonalpark
• tilby grunnleggande servicefunksjonar
• ha ein tydeleg og gjennomført miljøprofil som blir gjenspeila i landsbyen si utvikling

Bøverdalen er eit dalføre i Lom kommune med namn etter elva Bøvra, som renn gjennom dalen. Dalføret byrjar i kommunesenteret Fossbergom og går sør-vestover i retning Sognefjellet. 

Fylkesveg 55 fylgjer Bøverdalen til Kvandalsvoll, der dalen tek ein avstikkar der Neto Sætergrend ligg. Fylkesveg 55 går frå Kvandalsvoll og sørover Leirdalen, som ligg parallelt med Bøverdalen. Ved Jotunheimen Fjellstue går Fylkesveg 55 over til Bøverdalen att, og Leirdalen fortset rett sørover.

Tettstaden Galdesand ligg plassert i eit viktig vegkryss, der du kan ta vegen opp mot Galdhøpiggen eller halde fram over Sognefjellet og ned i det vakre fjordlandskapet på andre sida. Her bur du heilt på grensa til både Jotunheimen og Breheimen nasjonalpark, og du har tilgang til snø og skiforhold store deler av året! I området ligg det ein mengde med servicetilbod, som til dømes fleire hotell og overnattingsplassar, matbutikk, klatrepark og sommarskisenter. 

Garmo er den austlegaste delen av Lom kommune. Fjellet på båe sider høyrer med til Vårdalen statsålmenning. 

Garmo er kjent for å ha ein av dei beste barnehagane i landet (foreldreundersøkelsen 2021), med store og flotte areal både inne og ute. I Garmo har du kort veg til sentrum i Lom. Høgkollen er eit flott turmål i nærområdet, men det er også kort veg til flotte jakt, fiske- og turmoglegheiter, med m.a. Tesse og Soleggen i "bakgarden".

Her ligg og Brimiland, med fleire overnattingstilbod, matservering og klatrepark. I Garmo sentrum finst det eit eige gardsutsal, i tillegg til overnatting/serveringstilbod i sesong. 

Vårdølane har brukt og brukar fjellområdet i sør som ein del av gardsdrifta og livberginga. Reinsgraver finn ein ved Gråvåhøi og Koppane, i Smådalen og i Veodalen.

Lom sentrum, kalla Fossbergom, ligg rett oppunder den mektige Lomseggen.

Fossbergom er eit knutepunkt mellom aust og vest, med kort veg til både fjord og fjell.
Det bur i underkant ca. 800-900 personar i sentrum, men talet stig proposjonalt med vårsola og når sitt maksimum i juli. Lom har status som nasjonalparklandsby.