Teknologi er ein naturleg del av folk sin kvardag. Vi brukar kalenderfunksjon på mobilen for å organisere dagane, investerer i klokker for å måle puls og søvn, har robotstøvsugarar og anna teknologi i huset som kan styre lys, varme og mykje meir.

Ordet meistringsteknologi blir brukt om tekniske løysingar som kan vere med på å auke ein person sine evner til å meistre sin eigen kvardag, og bidra til auka tryggleik og livskvalitet. Teknisk utstyr kan varsle om mellom anna fall, brann, vasslekkasje, og om nokon går ut om natta. I tillegg kan ein nytte teknologien til å halde kontakt med vener og familie.

Bruk av meistringsteknologi inneber ei auka satsing på brukarane sine eigne ressursar.

Målet er å skape ein tryggare, enklare og meir sjølvstendig kvardag. Meistringsteknologi er spesielt formålstenleg for personar med kroniske sjukdommar eller funksjonsnedsetting av ulike former.

Ofte vil det vere slik at ein oppnår størst utbytte av meistringsteknologisk utstyr når ein tek det i bruk tidleg. 

Å tilpasse ein bustad er å gjere den egna til å bu i med tanke på framtidige helseutfordringar.

• Er det her eg skal fortsette å bu?
• Har eg alt eg treng på ei flate?
• Er bustaden min tilrettelagt for framtida?
• Har eg gangavstand til viktige funksjonar, som nærbutikk, helsetenester og busstopp?
• Er det elektriske anlegget i god stand, med tanke på branntryggleik?
• Har eg god internett- og telefondekning? (Dette gjer det mogleg å ta i bruk hjelpemiddel som sender varsel ut frå bustaden).
• Kan eg kome meg ut og vere sosial når eg ønskjer det?
   

Du må avgjere korleis du vil bu – før andre avgjer for deg!

Kommunen gjer ei individuell kartlegging. Kartlegginga skjer i samarbeid med deg og eventuelt dine pårørande. Meistringsteknologiske tenester blir førstevalet der dette gir tilstrekkeleg hjelp, og fører til minst mogleg endringar.

Kva kan hjelpemiddelsentralen hjelpe deg med?

Alle med langvarig behov for hjelpemiddel, kan søkja om hjelp frå NAV. Hjelpemidla må vere nødvendige og hensiktsmessige for å hjelpe deg å løyse praktiske vanskar i kvardagen, eller for at du skal kunne bu heime så lenge som mogleg.

NAV Hjelpemiddelsentral har ei rekke hjelpemiddel du kan søkja på. Du kan òg ta kontakt med ergoterapeuten i kommuna, som kan hjelpa deg med søknaden.

Kontaktinformasjon for å få hjelpemiddel i dei ulike kommunane – sjå under kontaktinformasjon.

Tryggleiksskapande teknologiar:
Gjer at menneske kan føle seg trygge og kan bu heime lenger. Her finn du løysingar som kan motverke einsemd og gi høve til sosial deltaking.
Til dømes: tryggleiksalarm, GPS for rørslefridom, dørsensor, komfyralarm, videokommunikasjon og meir.

Meistringsteknologiar: 
Gjer det mogleg å betre meistre eiga helse. Her finn du teknologiske løysingar til personar med kronisk sjukdom og personar som treng opptrening, rehabilitering og vedlikehald av bevegelse (mobilitet). 
Til dømes: medisindosett med varsling, nettbrett med ulike funksjonar med meir. 

Helseteknologiar:
Gjer det mogleg med avansert medisinsk utgreiing og behandling i heimen.
Til dømes: avstandsoppfølging av kroniske sjukdommar.

Velværeteknologiar:
Bidrar til å støtte opp om daglegdagse gjeremål og til at personen får brukt ressursane sine.
Til dømes: undervisnings- og treningsprogram, smartklokke, robotstøvsugar, omgivnadkontroll for styring av lys og varme, smarthusløysingar, tv-speltrening med meir.

Du kan ta kontakt med tildelingskontoret.