Tomtene

I Leirmoskog ligg det fire ledige tomter til sals som er delvis byggeklare, men ikkje oppmålte. Pris ved kjøp er kr. 15,- pr. kvm, i tillegg kjem det ein refusjonskostnad (eingongskostnad) på kr. 30 000,- pr. tomt, i tillegg til oppmålingsgebyr m.m.

Ved kjøp av tomt 6 og/eller 7 treng du ikkje å betale noko refusjonsgebyr. Her er det mogleg å bygge ein- eller tomannsbustad, etter ynskje. Tomtene kan ikkje nyttast til bygging av fritidsbustad. 

Ta kontakt med kommunen for meir detaljar. 

Området

Bustadfeltet Leirmoskog ligg i Bøverdalen, omtrent ein halvtimes køyretur frå Lom sentrum langs Fylkesveg 55 (Sognefjellsvegen). Her bur du tett på både Jotunheimen og Breheimen nasjonalpark, i tillegg til kort avstand til m.a. Galdhøpiggen Sommerskisenter.

Det er matbutikk like i nærleiken (Coop på Galdesand). Når Sognefjellet er ope (omtrent mai-november) er det kort veg over til nabokommunen Luster og det flotte fjordlandskapet i Sogn. Bøverdalen er særleg populært for turistar i vårski- og sumarsesongen. 

Barnehage, barneskule, ungdomsskule og vidaregåande skule finn du ein halvtime unna, i Lom sentrum (Fossbergom). Telenor har bygd ut fiber i området. Ta kontakt med kommunen dersom du ynskjer meir informasjon.  

Lom kommune

Lom ligg i Nord-Gudbrandsdalen i Innlandet fylke, og grensar til Vågå, Skjåk, Luster, Vang og Lesja. Kommunen har eit areal på 1945 km2, og rundt 2200 innbyggjarar.
 
Lom er den mest typiske fjellkommunen i Noreg, med 135 eigne toppar og 23 grensetoppar over 2000 moh. Rundt 60% av arealet i Lom er verna og kommunen har m.a. tre nasjonalparkar (Breheimen, Jotunheimen og Reinheimen). Sentrum fekk status som nasjonalparklandsby i 2008. Fossbergom er kjent for å vere eit triveleg handelssentrum, og har også lange tradisjonar innan reiseliv og landbruk. Heile Ottadalen er eit eldorado for deg som er glad i natur og friluftsliv, men det finst også eit godt tilbod innan kultur og idrett.